客家山歌（四）
摘要 : (46)羅崗風情羅浮行下系羅崗，久聞羅崗好地方，半街一條桂花樹，大風吹來滿街香。羅崗行下八角亭，肚飢目睡冇精神，千人萬人涯唔想，只想親哥一個人。羅崗行出柑村街，十個公雞九個啼，十個阿哥九個...
(46)羅崗風情
羅浮行下系羅崗，
久聞羅崗好地方，
半街一條桂花樹，
大風吹來滿街香。
羅崗行下八角亭，
肚飢目睡冇精神，
千人萬人涯唔想，
只想親哥一個人。
羅崗行出柑村街，
十個公雞九個啼，
十個阿哥九個妹，
虧了單身小老弟。
二五八日羅崗圩，
白鴿帶鈴雲下行，
白鴿帶鈴雲下走，
超上超下因為你。
羅崗行下白石嶺，
妹在園中喊一聲，
雙手攀等黃葉菜，
摘葉留心等後生。
羅崗行上柿子坪，
郎打官司妹出名，
只要妹子照郎轉，
十場官司十場贏。
一條山崗繞繞長，
行了一晝正半崗，
有情妹子回頭看，
冇情妹子照崗上。
上了一崗又一崗，
一身大汗熱難當，
路上遇了有情妹，
衫尾撥到兩人涼。
上崗唔怕崗子長，
路上遇了有情郎，
同郎行路當做轎，
言語落肚甜過糖。
上崗唔得半崗企，
手攀茶樹拗茶枝，
拗到茶枝吞落肚，
幾多掛慮妹唔知。
上了高崗過橫排，
阿哥手裡拿雙鞋，
丟了一隻妹撿起，
日後冇雙會尋涯。
上了高崗過橫排，
丟了扇子丟了鞋，
丟了草鞋還得過，
丟了扇子熱死涯。
高岽坪來矮岽坪，
難逢難遇共同行，
大樹頭下嬲一陣，
番禾見水心就生。
阿哥同妹隔條崗，
手拿笠麻來招郎，
手拿笠麻招三下，
魂魄飛到妹身旁。
(47)山遙水遠
日頭一出東邊紅，
郎在西來妹在東，
一心都想同妹嬲，
山遙水遠信難通。
有柬怪來冇柬奇，
有信去哩冇信回，
臘蔗伸尾多一想，
柑子生蟲桔（急）壞哩。
同妹隔山又隔河，
阿哥緬妹妹緬哥，
柬好姻緣千里遠，
樣得團圓共下坐。
九皮篾青九皮囊，
久見嬌容月溯長，
鐵樹開花難得見，
露水泡茶難得嘗。
花缽肚裡種古松，
好久唔曾見嬌容，
哪人搭得伢信到，
五更落露就多蒙。
阿哥同妹隔條江，
哥變鯉魚透水上，
有日阿妹來擔水，
被爾汲到心也涼。
郎在這邊妹那邊，
隔條河水樣得前，
對面渡船撐妹過，
一人願出兩人錢。
(48)交情水柬濃
急水灘頭洗圍裙，
大水打到河中心，
哪人收得圍裙轉，
人情交到水柬深。
急水灘頭落花針，
失手跌落河中心，
哪人尋得原針轉，
人情交到水柬深。
井底讀書禮義重，
妹子言語動郎心，
唔怕過河風浪大，
總愛交情水柬深。
妹子同哥心夾心，
唔怕大河水柬深，
脫下羅裙來過水，
為情浸死也甘心。
新買團扇畫麒麟，
兩人講過千年情，
牽手來照河中水，
河裡冇水正斷情。
(49)打扮阿妹滿頭紅
女：十二月來又一冬，
冇條髻索扎髻宗，
哥係有心剪幾寸，
打扮阿妹滿頭紅。
男：一蘿柑子半蘿囊，
未曾測過妹心腸，
未曾測過妹心事，
未敢打扮妹排場。
女：木杓打水面盆裝，
問哥下府幾時上，
問哥下府幾時轉，
潮州絲線帶二兩。
男：州里行下狀元橋，
唔曾得過妹功勞，
眼鏡唔曾買一副，
手巾唔曾買一條。
女：河水緊大緊漂江，
只有流下冇流上，
只有阿哥打扮妹，
哪有妹子打扮郎？
男：河水緊大緊漂江，
湧水角頭逆水上，
也有阿哥打扮妹，
也有阿妹打扮郎。
(50)唔怕路途長
燕子含泥過九江，
因為冇雙到此方，
南海蝴蝶飛過港，
有情唔怕路途長。
入廟燒香因為神（誠），
月下紡線因為情，
千遠路頭尋妹嬲，
朝晨行到月東昇。
莫話冇心算有心，
翻山過坳都來尋，
妹子手長衫袖短，
唔曾帶有好點心。
妹子住在半山排，
害涯行爛幾雙鞋，
你係有心應一句，
你係冇心愛辭涯。
有米煮粥莫嫌鮮，
最怕冇米斷火煙，
有情唔怕深山隔，
冇情枉為屋相連。
山頂有花山腳香，
橋下有水橋上涼，
有情千里來相會，
冇情對面冇商量。
新買花缽種海棠，
清風吹來陣陣香，
萬里蝴蝶飛來採，
採花唔怕路途長。
日頭又烈山又嶇，
又冇酒店又冇圩，
又冇細茶妹止渴，
又冇糕餅妹充飢。
(51)唔怕人閒言
燒窯唔怕火燒天，
連妹唔怕人閒言，
旁人愛講由拒講，
講得多來拒會懶。
鐮刀唔利唔割禾，
竹篾唔韌唔織籮，
交情就愛交到底，
莫聽旁人來挑唆。
種竹最怕竹打花，
黃麻最怕會生杈，
囑妹連郎心愛定，
唔好聽人花舌麻。
唔怕別人講短長，
越講兩人情越長，
好比門前桂花樹，
大風越吹花越香。
高山頂上種頭蕉，
根深唔怕大風搖，
阿哥有情妹有義，
哪怕旁人兩面刀。
風吹竹葉滿天飛，
人人都話涯同爾，
食盡幾多斷節米，
聽盡幾多冷語言。
妹子愛來只管來，
莫被兩邊人隔開，
莫怕兩邊人阻隔，
水流燈草放心來。
大路同行怕誰知，
唔怕旁人話是非，
桅杆頂上曬燈草，
真心唔怕大風吹。
(52)唔怕名聲出
妹子連郎唔怕難，
鯉魚唔怕網來攔，
水深涯會石下鑽，
水淺連跳兩三灘。
新做大屋間花窗，
唔怕雨來唔怕風，
只要兩人心甘願，
唔怕名聲上廣東。
當梨緊熟味緊甜，
名聲緊出情緊行，
囑妹莫怕名聲出，
名聲越出事越成。 日頭唔怕月爭光，
玉蘭唔怕花比香，
交情唔怕大聲講，
相好唔怕常來往。
點火來燒勒頭蓬，
囑妹連郎膽愛雄，
驚燒怕冷難成事，
三思六想枉人工。
(53)挨打不丟郎
新做大屋白瑩瑩，
一對金雞瓦上行，
瓦片割斷金雞腳，
血水淋身也愛行。
唔怕死來唔怕生，
唔怕別人斬腳踭，
斬了腳踭留腳趾，
兩人有命總愛行。
花缽肚裡種海棠，
唔怕雪來唔怕霜，
唔怕兩家人管束，
只怕兩人冇行往。
麻餅好食肚裡黃，
打生打死因為郎，
前門趕到後門轉，
目汁未乾又想郎。
妹唔講來哥也知，
哥在門外看等哩，
打就打在妹身上，
疾就疾在郎心裡。
愛打愛罵妹唔驚，
冇頭剩頸也愛行，
口渴專食炒豆子，
肚飢專食蘿蔔星。
腳踏板凳手爬牆，
兩眼睜睜望情郎，
昨日為郎挨了打，
情願挨打不丟郎。
妹受打罵因為郎，
打在你身痛我腸，
一心都想來救妹，
又怕雪上再加霜。
打也唔怕罵唔羞，
門前打來門後溜，
皮肉打爛筋還在，
唔行到老心唔休。
鏟了草皮來遮灰，
大風大雨打唔開，
大風大雨打唔散，
打生打死做一堆。
兩人相好出了名，
天大事情唔使驚，
吊頸就愛共條樹，
生埋也愛共條坑。
(54)敢見叔伯敢見官
生愛連來死愛連，
官司打到衙門前，
殺頭好比風吹帽，
坐檻好比嬲花園。
阿哥心裡唔使慌，
天大事情妹抵擋，
去到官廳妹會講，
使了銀錢妹會幫。
敢吃楊梅唔怕酸，
敢見叔伯敢見官，
敢戀阿哥敢出面，
刀子架頂刀下鑽。
哥莫驚來哥莫愁，
哥系送官妹出頭，
只有殺人犯殺罪，
哪有連妹會殺頭？
阿哥敢食三斤羌，
妹子敢頂三下槍，
妹系坐牢郎送飯，
郎系殺頭妹抵當。
敢拆庵堂唔怕神，
敢連阿妹怕麼人？
阿哥好比諸葛亮，
唔怕曹操百萬兵。
郎係有情妹有情，
敢連妹子怕麼人，
擔竿頭上挽佛子，
有事阿哥會擔神（承）。
赤腳過河唔怕沙，
敢連阿妹怕哪儕，
唔怕惡蛇來攔路，
唔怕老虎來開牙。
磚砌牆頭層數層，
唔怕祖宗家法狠，
十枚鑽子九枚頂，
一身鑽爛情唔斷。
高山頂上一條松，
唔怕雨來唔怕風，
總愛妹子心裡定，
鐵打獅子郎會東（頂）。
上系石壁下系潭，
左系崩崗右系岩，
總愛兩人心甘願，
上天冇路也愛行。
(55)同到老
黃竹破篾一層皮，
講過愛你就愛你，
兩人有心同到老，
竹頭生尾望伸尾。
榕樹落葉唔脫皮，
阿哥柬苦唔丟爾，
苧子同棉一下紡，
兩人夾線到伸尾。
河唇石子堆數堆，
爾愛交情講過來，
交情講到九十九，
行路唔得坐轎來。
爾愛交情只管交，
切莫交到半中腰，
洗衫愛洗長流水，
曬衫愛曬長竹篙。
竹頭生筍節節高，
節節也有竹殼包，
你愛包來包到底，
切莫包到半中腰。
燕子含泥過九江，
妹子送郎出外鄉，
九月九日種韭菜，
兩人交情久久長。
新買紙扇十八行，
妹子說話好心腸，
聽妹言語紙包起，
割草留根望久長。
六月過了七月秋，
小溪出谷望長流，
黃鱔生鱗馬生角，
鐵樹開花心唔休。
爾話交情久交情，
交情愛交一生人，
哥系天心明月樣，
妹系星星伴月明。
兩人相好心夾心，
千年鐵樹萬年松，
命有柬長情柬久，
交情越久情越深。
上樹爾愛上到尾，
切莫半腰拗花枝，
交情爾愛交到老，
切莫貪心搞兒戲。
黃鱔落田貪沙溜，
紙鷂上天望風流，
韭菜割撇望生筍，
高山出水望長流。
三十日來轉角圩，
兩人交情月（熱）盡哩，
桅杆底下種豆子，
爾係有心纏到尾。
燕子含泥壁上企，
兩人相好結夫妻，
莫學苦瓜心裡苦，
愛學臘蔗甜到尾。
兩頭絲線長又長，
打個結頭丟過梁，
千年唔見結頭散，
妹子永久唔丟郎。
十八同到八十三，
自都唔曾有怨聲，
棟樑架過三間屋，
冇人有涯柬長桁（行）。
(56)生死戀
入山看見藤纏樹，
出山看見樹藤纏，
樹死藤生纏到死，
樹生藤死死也纏。
半山腰上種條松，
松樹下面種芙蓉，
芙蓉底下種生葛，
生生纏死嫩嬌容。
麻花手扼扭絲纏，
纏了一層又一層，
妹子好比雪豆樣，
葉黃根死心也纏。
龍田行上系大坪，
兩人相好出了名，
有錢難買甘願事，
生死同哥共路行。
爾愛交情講過來，
愛學山伯祝英台，
在生兩人共枕睡，
死後兩人共棺材。
新做書桌釘銅釘，
死同死來生同生，
還生兩人共枕睡，
死後兩人共金罌。
生愛纏來死愛纏，
生死都在郎身邊，
哥系死了變大樹，
妹變葛藤又來纏。
生愛連來死愛連，
生死都在妹面前，
妹變黃魚沈水底，
哥變鯉魚護兩邊。
生愛連來死愛連，
生死都在妹面前，
阿妹死了變綢緞，
哥變針線又來連。
(57)莫連多
黃竹細細尾拖拖，
囑妹連郎莫連多，
一個扣眼安個紐，
一支秤桿配個砣。
天上星多月唔明，
塘里魚多浪唔停，
河裡船多難開槳，
妹子心多搞亂情。
番豆緊老仁緊精，
同妹緊久緊入情，
八仙桌上放盞燈，
囑妹添油莫換心。
一個雞蛋一個黃，
一妹莫連兩個郎，
花針難穿兩條線，
一人莫睡兩張床。
戴了笠麻莫擎遮，
連了一儕莫兩儕，
一壺難裝兩樣酒，
一樹難開兩樣花。
有雙有對心莫多，
愛記冇雙打單坐，
有油莫開雙盞燈，
愛記冇油打暗摸。
千囑萬囑囑親哥，
囑哥連妹莫連多，
蘇木剪糕因色死，
石榴斷叉因花多。
連了別人又連涯，
河裡船多就礙溪，
三條帆船共條纜，
唔係斷拒就斷涯。
阿妹好比畫眉鳥，
條條花樹跳到交，
雖然樣子得人惜，
性情柬野涯就惱。
一隻雞子許三神，
許了阿哥許別人，
上下見到冇想問，
面敖面歪羞哪人？
姜公釣魚石上企，
釣了鯽魚又想鯉，
早知爾鬼心肝壞，
舌頭講爛唔連你。
鴉鵲飛來大樹下，
唱了歌子打盤車，
句句都話鵲阿鵲（惜），
到底唔知惜哪儕？
心就黃連口就花，
連了阿妹連別儕，
早知爾鬼心柬壞，
唔該惹爾兩頭蛇。
烏鴉落地做雞啼，
先日講過單同涯，
今日又同第二個，
哪有面目來見涯。
嶺崗頂上盤湖鰍，
阿哥唔曾戀過有，
貓公還在燈盞背，
樣般老鼠敢偷油？
(58)一時香
茶油煮菜一時香，
松毛點火一時光，
零星打酒食唔醉，
唔當自家蒸一缸。
著襪樣般過得河，
天井樣般蒔得禾，
露水夫妻有長久？
世上冇人娶老婆。
拆屋挖塘養鴨麻，
因為嬌娥拆散家，
三九打做二十八，
過後正知算打差。
(59)各人姻緣各人份
翠子捕魚著綠衫，
害涯鯉魚著下驚，
各人姻緣各人份，
爾莫甲死中落潭。
涯唔同你講牙花，
涯有丈夫你有家，
瓦斗烟筒石上敲，
爾要顧等爾腦瓜。
石板打穀些些開，
粘谷唔撈糯穀堆，
各人姻緣各人份，
各人自重愛行開。
你有老婆涯有夫，
你也唔使眼啾啾，
隔夜飯湯來洗面，
問你知餿唔知餿（羞）。
妹子有情涯也知，
可惜阿哥已娶妻，
兩人雖好莫邪念，
免得旁人講是非。
月光肚裡一枝花，
柬好妹子唔係伢，
苦瓜柬苦吞落肚，
甘蔗柬甜愛吐渣。
(60)枉心機
問你唔應枉我言，
笠子斷筐枉篾纏，
石壁栽秧空下種，
有針冇線打空連。
泥塑神像問唔聲，
兩行橫屋妹冇廳（聽），
啞子娶妻冇話講，
雪打燈草心滑冷。
三步行來兩步企，
一心一意來等爾，
等到你來冇話講，
燈草織布枉心機。
問妹唔聲枉哥言，
爛籮爛筐枉哥纏，
紗紙拿來做衫著，
鉤針密縫枉哥連。
拆了神廟做茶亭，
害涯費了幾多神，
師父教拳徒弟打，
兼身唔到也閒情。
風吹竹葉半天飛，
樣得竹葉轉竹尾，
三餐食個斷節米，
樣得團圓轉米篩。
看天唔係落雨天，
看妹唔係涯姻緣，
打過斧頭換過柄，
起眼唔看這片天。
隔河連妹難兼身，
想去過河水又深，
想變老鷹又冇翼，
想變鯉魚又冇鱗。
月光帶嵐月在心，
前三四年想到今，
燈草拿來穿針眼，
問爾樣般過狠心？
阿哥想妹二三年，
至今婚姻未成全，
瓦缽拿來種韭菜，
樣般自家柬冇緣！
想爾一年又一年，
古井燒香暗出煙，
豆子纏到禿尾竹，
阿哥冇心枉涯連。
嶺崗頂上種條松，
一心都望雨來淋，
只聽雷聲唔聽雨，
幾多焦急在心中。
半夜入園去摘蔥，
摘到蕹菜兩頭空，
半夜捉豬唔開火，
上鉤唔得枉人工。
郎係日頭妹系星，
爾就落山涯出身，
日里緬你冇面見，
夜裡緬你冇見身。
三弦跌落大海心，
好久唔曾聽琴音，
燈草撐船來去取，
害涯費了幾多心。
高山頂上一株梅，
探你唔得枉花開，
三籮穀殼丟落海，
樣得團圓做一堆。
一朵紅花隔重牆，
摘花唔到枉花香，
入水鷺鷥束了頸，
柬好鮮魚唔入腸。
新買繡鞋菊花邊，
舊年想妹到今年，
百般好話都講盡，
六月火爐難近前。
同妹柬久黏唔秋，
石板做凳系難丟，
大風吹散燈草把，
撩亂我心樣得收。
足錫茶壺系冇鉛，
燈盞冇心也枉然，
三升糯米裹只粽，
皮熱心生枉郎纏。
有心紡織冇心賡，
有心連妹冇心行，
新做大屋冇瓦蓋，
枉了人工枉了桁.
畫眉眼來黃蜂腰，
相貌又好聲又嬌，
柬好人材借眼看，
連妹唔到心正焦。
黃蜂咬斷絲瓜藤，
冇竹冇架樣般纏？
瞎子過橋丟了杖，
冇人牽帶難行前。
想唱山歌冇口才，
想捉鷓鴣冇鳥媒，
想照蛤蟆又冇火，
柬好嬌蓮冇做堆。
高山頂上種牡丹，
看就容易折就難，
月弦掛在雲端上，
樣得親哥巧手彈。
嘀嘀惜惜嫩阿姨，
好比籠中山畫眉，
一心都想尋你嬲，
可惜籠門關緊哩。
烏雲遮月月唔明，
霧裡看花花唔真，
冷水蒸飯難上氣，
針筒打米難上升。
|
沒有留言:
張貼留言