客家山歌（六）

客家山歌（六） 2012-3-19 17:03 |發布者: 杭網二號|查看: 771 |評論: 0 |來自:上杭光中軒 摘要 : (76)一心打兩意八月秋雨唔過坪，東邊落雨西邊晴，阿妹一心打兩意，又想斷情又想行。柑子跌落古井中，一半浮來一半沉，爾系愛沉沉到底，莫來浮起動郎心。隔遠聽到崩博（堤）聲，看緊有行又冇行，一陣... (76)一心打兩意  八月秋雨唔過坪， 東邊落雨西邊晴， 阿妹一心打兩意， 又想斷情又想行。 柑子跌落古井中， 一半浮來一半沉， 爾系愛沉沉到底， 莫來浮起動郎心。 隔遠聽到崩博（堤）聲， 看緊有行又冇行， 一陣日頭一陣雨， 看緊有晴又冇晴。 燈草拿來吊油罌， 雖然唔斷得人驚， 爛鞋拿來打四掌， 唔曾想到還有行。 禾雀飛來瓦上行， 又想食穀又想飛， 又想約哥同妹嬲， 又想上山割櫓箕。 哥愛落雨妹愛晴， 哥愛斷情妹愛行， 交情就係哥心願， 斷情也愛妹心甘。 講笑唔好講傷時（傷情）， 騷癢唔好騷脫皮， 上晝南風下晝北， 天變一時就係爾。 　  (77)變心  十三四歲織綾羅， 哪人教曉爾挑梭（唆）， 飽鴨落田唔聽喚， 哪人教壞伢嬌娥？ 先日同涯柬熱情， 今日變心連別人， 曬香遇到天落雨， 唔曾想到就變情。 食了火炭黑了心， 雕子飛入別人籠， 芋子拿來切做種， 側面生芽起橫心。 唔曾落雨先起風， 冇緣冇故斷涵公（河堤）， 看妹做了虧心事， 唔曾食酒面柬紅。 大路唔行行路邊， 打側遮子唔看郎， 遮子還是涯買個， 哪人教壞妹心腸？ 天愛落雨莫怨天， 愛念當初日曬田， 今日冇情來反面， 愛記當初枕上言。 畫眉出籠滿天飛， 丟了鳥籠並水池， 唔記當初椿絲米， 要記六月打蜢時。 先日同涯暖溫溫， 口水拿來當茶吞， 今日來講斷情事， 縣官難判心難忍。 糕子食了紙還在， 爾愛包回原樣來， 先日講個乜個話， 爾愛講回原話來。 二月燕子口含泥， 一隻飛高一隻低， 路上遇到冇相問， 哪條心事來怨涯？ 初十去赴徑心街， 妹子遇到唔問涯， 手做枕頭爾貼過， 哪條心事來怨涯？ 行等好好來斷情， 樣般冇風會起塵？ 苦瓜藤上打吊菜， 水上攤席涯難眠（明）。 鹹菜入甕屈了心， 三弦唔和走了音， 六月老酒反了腳， 冇情妹子反了心。 當日同涯好過來， 今日丟涯想唔開， 三斤豬肉做一料， 爾想拆秤（陣）拿刀來！ 　  (78)斷情  著襪唔知腳下暖， 脫襪正知腳下寒， 交情唔知情柬好， 斷情正知割心肝。 十年相好一朝斷， 利刀落肚割心肝， 石獅聽到出目汁， 佛像看到心也寒。 去年喊斷唔曾斷， 今日斷情割心肝， 床上目汁好洗面， 床下目汁好行船。 當日愛涯喊親哥， 今日丟涯冷凳坐， 大風吹斷柑子樹， 害涯撿到桔（急)柬多。 先日愛涯一團金， 今日丟涯滑眼針， 冷水來淋隔夜飯， 爾今落托涯冷心。 日頭轉影樹轉陰， 先日兩人共條心， 今番講著斷情話， 松毛做菜會刺心。 先日同涯糖柬甜， 今日丟涯雪柬冷， 十五造橋十六拆， 樣般爾鬼心柬橫! 甜酒拿來吵牛肝， 吃落正知肚裡酸， 今番來講斷情事， 試問哪人起因端？ 當日交情樣樣貪， 今日斷情樣樣嫌， 麻石探橋爾做個， 樣般今日就唔行！ 拆得園籬來種蕉， 先日有園今就冇， 路上逢到冇相問， 犁壁冇爾面就敖。 烏鴉落地做雞啼， 冇緣冇故來丟涯， 老蟹吊頸冇頭榻（系）， 水桶裝鯇囫（屈）死涯。 看等天光天未光， 打開間門看月光， 先日有情嫌夜短， 今日冇情怨夜長。 先日同涯糖柬甜， 今日丟涯雪柬冷， 糖鍋拿來炒豬膽， 先甜後苦心唔甘。 先日當涯一枝花， 今日丟涯當泥沙， 十字街頭買節蔗， 食了甜水就吐渣。 落雨著屐丟了鞋， 阿哥有雙丟了涯， 鴉鵲有雙樹上嬲， 鷓鴣冇雙日夜啼。 先日同涯燒煨煨， 斧頭來劈劈唔開， 今日兩人分了手， 天車來絞難做堆。 　  (79)嫁錯郎 絲瓜打花點點黃， 信錯媒人嫁錯郎， 入間好似有老虎， 睡目好比坐檻房。 娥眉月子彎鉤鉤，   好花種在爛缽頭， 當初信錯媒人話， 檀香對了沒（腐）樹頭。 深山竹子溜溜烏， 妹子嫁了歹丈夫， 唔曾安心食過飯， 唔曾安樂睡一晡。 六月撥扇心唔涼， 妹子跟了歹家娘， 出來還有人勸解， 回去好比坐檻房。 出也愁來入也愁， 千斤石板壓心頭， 日里還有人同陣， 夜裡目汁洗枕頭。 妹子有郎像冇郎， 夜夜來睡冷腳床， 冇奈枕頭唔曉話， 枕頭曉話會思量。 　  (80)單身漢自嘆 蛤蟆拐子叫連連， 想娶老婆又冇錢， 端張凳子同爺講， 搖頭嘆氣又一年。 手拿檳榔兩片開， 跟到窮爺又窮[女哀]， 三十多歲冇雙對， 鈍刀破竹想唔開。 天唔平來地唔平， 緊想緊真緊苦情， 幾多有錢討兩個， 幾多冇錢打單身。 單只單來單只單， 單只畫眉飛過山， 單只畫眉飛過坳， 日叫孤寒夜叫單。 小溪流水急啾啾， 流入大河慢悠悠， 月鴿帶鈴雲下走， 因為冇雙日夜遊。 九月過了十月朝， 霜打禾苗夜夜燥， 雕子冇娘磋磋叫， 阿哥冇妹心正焦。 摘了茶子收了冬， 十個山寮九個空， 十個山寮空九個， 剩郎冇伴在山中。 天井蒔田涯冇田， 花缽種菜涯冇園， 啞子食著單只筷， 心想成雙口難言。 　  (81)單身妹自嘆  石壁種菜涯冇園， 唔得開花出頭天， 過月雞公唔打嘴， 屈死幾多嫩嬌蓮。 日頭落山又一天， 妹子單身又一年， 心想連郎人阻隔， 扁柴燒火炭（嘆）冇圓。 越想越真越苦情， 妹子白手打單身， 風吹茅草冇依靠， 轉眼冇個痛腸人。 想起冇雙真痛腸， 夜夜自家一張床， 這邊床桿妹睡爛， 那邊床桿又生秧。 日頭一出望雲遮， 田裡冇水望踏車， 四月冇糧望早谷， 妹子冇雙望哪儕？ 因為冇雙受孤淒， 叔公打來鄰舍欺， 三十三隻尿桶耳， 九十九屈冇人知。 日頭一出烈磋磋， 爺娘丟涯淨自家， 妹子好比苗竹筍， 自出山門冇葉遮。 　  (82)寡婦自嘆  葬了涯郎轉家庭， 走入房中少個人， 床上枕頭有雙只， 單身唔知哪頭眠。 十五唔敢看月光， 過年唔敢著新裝， 心中有話冇人講， 一生孤枕守空房。 床頭食飯床尾眠， 冇人比涯更苦情， 出門冇個親叔伯， 夜裡冇個痛腸人。 緊想緊真緊難捱， 想來想屈到雞啼， 怕聽人家郎喊妹， 怕看堂前祖公牌。 口渴難上這條崗， 肚飢難過四月荒， 守寡妹子難過日， 鎖匙難帶家難當。 托盤冇底樣般槓， 米升冇底樣般量？ 十八妹子來守寡， 塘里冇水魚難養。 托盤冇底樣般槓， 碗公冇底樣般裝？ 十八妹子來守寡， 嫩草難抵十月霜。 大伯阿叔莫留涯， 柬好田園也系泥， 百萬家財借過手， 總愛床下兩雙鞋。 六月難過當晝心， 守寡難過五更深， 唔想貞節牌坊樹， 只願嫁郎結同心。 　  (83)等郎妹  十八嬌嬌三歲郎， 夜夜愛涯牽入房， 鏡子麵前照一照， 唔知系子還是郎。    十八嬌嬌三歲郎， 睡目愛涯攬上床， 唔係看爾爺娘面， 三拳兩腳打下床。 十八嬌嬌三歲郎， 半夜想到痛心腸， 等得郎大妹又老， 等得花來葉又黃。 等郎妹子正孤淒， 等得郎大妹老哩， 等得葉濃花又謝， 等得月圓日落西。 　  (84)得病因為爾  莫話講笑​​唔相關， 因為講笑起因端， 自從同妹講笑起， 魂魄落在妹​​身邊。 赤米煮粥結層皮， 阿哥得病因為爾， 三餐食冇一合米， 拿妹言語來充飢。 三日唔食肚唔飢， 四日唔食因為爾， 燈草跌落豬紅缽， 血水攻心妹唔知。 阿哥得病因為爾， 龍膽鳳肝也難醫， 羚羊犀角食唔醒， 妹子一來就醒哩。 　  風吹竹​​葉響沙沙， 阿哥有病妹來邏， 掀開蚊帳問一聲， 當過洋參燉鴨麻。 阿哥得病妹心慌， 唔知系熱還繫涼， 系涼涯就買狗肉， 系熱涯就買蜂糖。  (85)親哥得病妹著驚  女:親哥得病妹著驚，     手撿燈籠星夜行，     雙手掀開綾羅帳，     問哥身體病重輕。 男：重唔重來輕唔輕，      難為阿妹有心行，      床下有張矮凳子，      坐等慢慢講爾聽。      日里發燒頭腦暈，      夜裡發冷勘勘顫，      因為妹子急起病，      冇人打得脈頭真。 　 女：自家有病自家知，       爾愛請到先生醫，       若係阿哥冇錢使，       妹子甘願當衫醫。 男：妹子心腸涯也知，      衫褲唔好當撇哩，      九冬十月天氣變，      爺娘知道會罵爾。 女：衫褲當撇冇問題，      爺娘知道唔怕拒，      衫褲當了贖得轉，      一朝冇郎枉心機。 講等講等就停腔， 面上轉青又轉黃， 額門點點出冷汗， 妹子心頭就著慌。 病情柬深妹心驚， 趕快出門當衣衫， 東街走到西街轉， 三步當作兩步行。 當舖門前喊一聲， 打開包袱當衣衫， 先生問涯當乜個？ 藍衫烏褲並頸鉗（圈）。 先生問涯當幾多？ 當夠一千三百三， 當了東西下街轉， 急急忙忙喊醫生。 走到下街喊醫生， 醫生步儀愛百零， 總愛醫好涯郎病， 錢財使得妹心甘。 帶等醫生急急行， 醫生看到也著驚， 馬上同哥來打脈， 拒話病情唔係輕。 醫生一看就光行， 手提毛筆開藥方， 百般藥材都開盡， 碗半水來兩片姜。 妹子出去撿藥方， 行到街上天未光， 撿到藥方回身轉， 唔得轉來見親郎。 手撿藥方亂忙忙， 一入房間先問郎， 手拿沙煲並火炭， 細心煲好又吹涼。 煲好藥方松入房， 雙手端得良藥湯， 這服靈丹食下去， 涯郎身體就安康。 　  (86)猜問 男：乜個圓圓在半天？       乜個圓圓水中間？       乜個圓圓樹上吊？       乜個圓圓妹面前？ 女：月光圓圓在半天，      荷葉圓圓水中間，      柑子圓圓樹上吊，      銅鏡圓圓妹面前。 男：乜個冇骨泥裡鑽？       乜個冇骨水里沿？       乜個冇骨街上買？       乜個冇骨妹胸前？ 女：蚯蚓冇骨泥裡鑽，      胡蜞冇骨水里沿，      豆腐冇骨街上買，      棉衫冇骨妹胸前。 男：乜個冇腳曉上天？       乜個冇腳會落田？       乜個冇腳河中走？       乜個冇腳妹身邊？ 女：火煙冇腳曉上天，      秧盆冇腳會落田，      木船冇腳河中走，      花籃冇腳妹身邊。 　 (87)嘲諷 石上種鬆冇正莖， 看爾唔係正經人， 水浸黃豆假大種， 泥塑觀音假正神。 三錢牛肉煮碗湯， 拿來出桌假大方， 四兩頓燭鬧大架， 冇紙燈籠吊乜腔（框）。 隔夜豬肉唔新鮮， 莫來作為寶貝般， 柬好花燈上街賣， 月半過後唔值錢。 拆了屎缸做廳堂， 爛壁上灰假排場， 初一燙豬十五賣， 臭肉煎油假清香。 紙鷂尾上吊石頭， 天時雖好唔風流， 牛骨拿來割佛象， 身裝雖好賤骨頭。 花鞋拿來打後踭， 樣子柬好唔奈行， 墨魚拿來上街賣， 味道柬好骨頭輕。 唱歌唔怕叔公知， 唔怕叔公留有須， 天晴拿來做掃把， 落雨拿來做蓑衣。 　 (88)調笑  男：標致妹子絕心肝，      約了涯來門又閂，      害涯屋背尋三轉，      難為爾鬼睡得安。 女：嚼爛舌頭嚼心肝，      屋門一夜唔曾閂，      鍋裡燉了相思酒，      酒壺燉爛酒燉幹。 男：門前有條月月紅，      朝朝洗面朝朝淋，      只見開花唔結子，      莫來映壞我門風。 女：好田愛有好牛耕，      牛仔冇力使唔行，      犁頭入土冇三寸，      叫我禾苗樣般生？ 男：兩頭索子狠對狠，      兩邊企個嫩嬌蓮，      妹子姻緣有涯份，      上天求水蔭爾田。 女：唔係神來唔係仙，      樣般爾鬼上得天？      背後湖洋曬爆斥，      樣般有水蔭我田！