客家山歌（二）

                                                                        
客家山歌（二）

2012-3-19 16:59 |發布者: 杭網二號|查看: 875 |評論: 0 |來自:上杭光中軒

摘要 : （31）約郎入坑日頭一出照山排，曬乾露水好打柴，前面有隻磨刀石，慢慢磨刀來等涯。竹槓一條篾一縈，問妹割草到哪坑，坑坑都有三岔路，三岔路口愛放青。妹子約郎去入坑，三岔路口愛插青，插青愛插布...
（31）約郎入坑
 日頭一出照山排，
曬乾露水好打柴，
前面有隻磨刀石，
慢慢磨刀來等涯。

竹槓一條篾一縈，
問妹割草到哪坑，
坑坑都有三岔路，
三岔路口愛放青。

妹子約郎去入坑，
三岔路口愛插青，
插青愛插布驚樹，
雖然葉死心還生。

手拿鋤頭去入坑，
坑頭坑尾聽爾聲，
大樹頭下講兩句，
一人做得兩人贏。
　
 （32）擔竿玉玉軟
 新買擔竿玉玉軟，
切莫將拒挑阿斷，
擔竿挑斷唔要緊，
只怕挑壞嫩心肝。

妹子入山挑石灰，
麼人搭信叫爾來？
石灰窖下加兩秤，
挑壞身子麼人賠？

一條擔竿玉玉軟，
對面來個伢心肝，
身上衣衫系涯做，
鈕扣滑撇涯會安。

見妹挑擔百二三，
阿哥心頭著一驚，
心想同爾伐（分輕）多少，
又見人多唔敢聲。
　
 （33）望天晴
 落雨洗衫冇哪晾，
踏出踏入望天晴，
一心都想尋妹嬲，
水浸天門冇路行。

手拿竹篙拉拉橫，
保佑今朝天愛晴，
曬燥衣衫俾妹著，
曬乾道路俾郎行。

初一落雨初二晴，
初三大雨浸禾坪，
手拿鋤頭交俾妹，
“開頭大路俾郎行。”

陰陰雨雨天唔開，
愁愁急急妹唔來，
阿哥好比梁山伯，
相思因為祝英台。
　
 （34）胡椒細細辣過姜
 三條火船過浙江，
一船胡椒二船姜，
莫話阿哥年紀少，
胡椒細細辣過姜。

禾苗細細谷柬精，
秤砣細細壓千斤，
畫眉細細柬會唱，
妹子細細柬熱人。

鴨子細細敢落塘，
鯉魚細細敢漂江，
蜜蜂細細戀花樹，
妹子細細戀情郎。

星子細細滿天光，
胡椒細細辣過姜，
妹子細細會打扮，
熱死幾多少年郎。

日頭柬烈路又燒，
姜頭姜辣放胡椒，
妹子滴惜（嬌小）又打扮，
斜眼割人利過刀。

星子細細亮晶晶，
妹子細細柬熱人，
新做藍衫冇鈕扣，
唔知幾時正上身。
　
（35）好花難得共條樹
正月過了二月來，
處處花園有花開，
好花難得共條樹，
好妹難得做一堆。

看等樹子生嫩芽，
看等樹子開紅花，
看等妹子日日大，
可惜唔知落哪家。

講也閒來笑也閒，
腳下冇雲上天難，
妹子好比月中桂，
看就容易倒就難。

郎在西來妹在東，
愛想見面路難行，
妹變黃鶯郎變鵲，
半天雲裡來相逢。

妹子生得柬斯文，
出入唔得共扇門，
食飯唔得共張桌，
洗面唔得共面盆。

做個後生眼柬歪，
翻來翻轉來看涯，
放個大方俾你看，
過後相思莫怨涯。

桐樹開花一球球，
樣得桐子打桐油，
樣得桐油來點火，
阿哥照火妹梳頭。
　
 （36）暈對暈
八股落甑蒸（真）斯文，
洋氈遮卵蓋一春，
碟子種菜園份淺，
檀香落爐暗中焚（暈）。

天想落雨起烏雲，
家法嚴條難出門，
丟了文書失了信，
穀雨蛤蟆有得暈。

火煙上天雲對雲，
毫子花邊銀對銀，
臘蔗同竹想對想，
后土對墓墳對墳（暈）。
　
(41)山歌落心上
 哥在外面唱山歌，
妹在房中織綾羅，
聽到阿哥山歌好，
兩手軟軟懶丟梭。 聽到阿哥山歌聲，

緊聽緊真心緊生，
山歌落在妹心上，
手裡紡車唔嘵行。

一陣阿妹過山畬，
山花插到髻尾斜，
聽到阿哥打呵嗨，
坐落山頭唱採茶。

百樣鳥雀百樣聲，
唔當畫眉柬好聽，
畫眉唱歌唔當妹，
聽妹山歌心裡甜。

山歌又好聲又靚，
畫眉難比妹歌聲，
上崗過坳唱一首，
百斤擔子也變輕。

山歌緊唱緊精神，
妹子緊大緊熱人，
好比探春雞攣子，
呱呱咯咯冇時停。

山歌緊唱緊入神，
兩人緊嬲緊深情，
鯉魚食到茶菇水，
齊家都係暈對暈。

唱歌就愛兩個人，
紡紗就愛兩條情，
彈琴就愛兩條線，
挨挨碰碰正熱人。
　
 (42)單看親哥
 阿妹割草上山崗，
翻去翻轉來看郎，
翻去翻轉踢腳趾，
只罵石頭唔罵郎。

哥在窗外打飛鳥，
妹在房中把手招，
阿娘問涯招乜個，
“做完針線伸伸腰”

妹在塘邊洗衣裳，
手拿樵槌眼看郎，
樵槌打在妹手上，
只怨樵槌唔怨郎。

一見妹子心就生，
失腳踏到妹腳踭,
妹子回頭笑一下，
心想罵郎唔敢聲。

滿街滿巷人擠人，
來看潮州迎大神，
大神柬好妹唔看，
單看親哥一個人。

新做眠床畫橫屏，
畫了牡丹畫麒麟，
柬好麒麟涯唔看，
只看親哥一個人。
　
 (43)夢見你
妹子挑水井邊企，
看到親哥笑嘻嘻，
親哥問涯笑乜個，
“昨夜發夢見到你”。

扇子撥爛骨還在，
檀香燒剩一爐灰，
手攀欄杆打瞌睡，
有情妹子託夢來。

新做眠床畫橫屏，
發夢同郎共床眠，
睡到半夜驚醒起，
又冇魂魄又冇人。

柬久唔曾見妹來，
鈍刀破竹想唔開，
還生愛有口信搭，
死了也愛託夢來。

阿哥走撇掛在心，
心中思念冇時停，
忽見親哥歸到屋，
醒眼正知夢中人。

想郎想到月轉西，
只怨隔壁五更雞，
夢中正想談心事，
拒在窗前亂聲啼。
　
(44)贈物
送郎一條花手巾，
日里洗面夜洗身，
手巾肚裡七個字，
永久千秋莫斷情。

阿哥送條花手巾，
只有洗面冇洗身，
洗完就愛壁上掛，
看郎唔到看手巾。

新買扇子畫條龍，
送給阿妹好搧風，
妹子莫嫌物件小，
一片相思在扇中。

新買花鞋束束花，
送妹著緊好上下，
送妹著緊好走路，
看哥唔到看腳下。

妹送毛衣軟綿綿，
唔知毛線幾多錢，
人工做了幾多日，
過後好算人工錢。

阿哥講話發乜顛，
相好樣般愛用錢，
兩人好比毛衣樣，
步步鉤針度度纏。

新買笠麻畫石榴，
送給阿哥遮日頭，
遮得日頭抵得雨，
免得阿妹顧兩頭。

哥送涼帽等下穿，
藍布縫唇花帶安，
涼帽肚裡有福字，
手拿涼帽遮心肝。
　
妹子送哥五里亭，
手撿香包帶郎身，
香包雖小情意重，
帶在郎身記妹心。

五月五日系端陽，
送哥帶子五尺長，
阿哥莫嫌帶子短，
帶子雖短情意長。
　

 新打耳環胡椒花，
交了耳環交縐紗，
問妹交情交幾久，
交到河裡冇水下。

哥送戒指一枚金，
失手跌落河中心，
戒指打走涯捨得，
難捨阿哥一點心。

送郎一條白手巾，
同哥白手講交情，
唔貪錢財妹打扮，
思量阿哥打單身。

新買扇子十二行，
一心買來送親郎，
有日同你做堆嬲，
一人撥扇兩人涼。
　
 (45)茶酒情
 新打茶壺八角花，
一心打來泡好茶，
阿哥泡茶唔出味，
妹子泡茶香桂花。

食茶愛食水仙茶，
連妹愛連畬坑嬤，
畬坑啊妹連得到，
菊花糕子送細茶。

食茶愛食蓋盅茶，
連妹愛連有情儕，
左手槓茶右手接，
眼拐打來衫袖遮。

一盅滾水一盅茶，
來得人多端哪儕？
天平厘戥涯曉使，
大稱單鉤挽哪儕？

石上種茶石下蔭，
手攀茶樹摘茶心，
妹系細茶哥系水，
滾水泡茶就開心。

雨前時節採嫩茶，
約到親哥到妹家，
頭春細茶拿來泡，
喝到兩人開心花。

食妹細茶莫嫌淡，
食落肚裡正知甘，
雙手槓茶哥止渴，
妹個人情哥愛領。

食我茶來莫嫌淡，
今年茶樹未曾青，
九皮茶葉泡碗茶，
總愛人情長久行。

食你茶來領你情，
茶杯照影影照人，
連茶連杯吞落肚，
十分難捨你人情。

蓋杯沖茶圓叮噹，
因冇茶托手來槓，
雙手槓茶妹唔接，
莫非怕郎放砒霜？

唔係怕爾放砒霜，
阿哥槓茶唔敢當，
岌崗頂上滾石子，
只有翻下冇翻上。

阿妹端來一盅茶，
肚裡柬渴吞唔下，
一來就怕迷魂水，
二來又怕口涎渣。

妹子敬哥一盅茶，
雖然唔渴愛吞下，
有情唔怕迷魂水，
夾心唔怕口涎渣。

阿妹泡茶味道甘，
還有滾水泡壺添，
好茶緊食緊有味，
同妹緊嬲心緊生。

妹子約郎甘露亭，
泡片細茶會情人，
勸哥莫去論茶色，
落口正知味道清。

食酒就愛上高樓，
求仙就愛上羅浮，
連妹就愛下鬆口，
性情又好又溫柔。

新打茶壺面面光，
好酒就愛好壺裝，
親哥篩個梅花酒，
妹子篩個酒梅花。

好酒唔使緊篩來，
篩到一杯蓋滿台，
好妹唔使郎搭信，
三日一回拒會來。

蠟燭點火溜落台，
請貼請哥哥唔來，
哥係有心來看妹，
三年老酒拿來開。

火煙相蓋屋相連，
連妹愛連上下年，
好比雄雞來炒酒，
雄雞炒酒狠對狠。

交條人情天般難，
斷條人情一時間，
甜酒變酸就容易，
酸酒變甜就艱難。

食醉燒酒打腳偏，
一傾傾到妹面前，
冇情妹子用眼看，
有情妹子用手牽。

食酒愛食珍珠紅，
行路愛行大崗龍，
交情愛交有情個，
行到黃泉一雙雙。

好酒就愛好甕裝，
好妹就愛連好郎，
好妹好郎成雙對，
綠葉紅花分外香。