客家山歌（一）
摘要 : （1）引歌神光山上搭歌台，男女歌手逞歌才。山歌好比汀江水，源遠流長滾滾來。客家山歌特出名，條條山歌有妹名，條條山歌有妹份，一條冇妹唱唔成。客家山歌遠傳揚，條條唱出情意長，句句唱出郎心事， ...
（1）引歌
神光山上搭歌台，
男女歌手逞歌才。 山歌好比汀江水， 源遠流長滾滾來。
客家山歌特出名，
條條山歌有妹名， 條條山歌有妹份， 一條冇妹唱唔成。
客家山歌遠傳揚，
條條唱出情意長， 句句唱出郎心事， 聲聲唱出妹心腸。
山歌緊唱緊新腔，
唱出日頭對月光， 唱出麒麟對獅子， 唱出金雞對鳳凰。
（2）讚美
月光冇火樣柬光， 井裡冇風樣柬涼， 妹子今年十八歲， 身上冇花樣柬香。
嶺崗頂上種芙蓉，
唔曾淋水葉柬濃， 這個阿妹樣柬好， 唔曾食酒面緋紅。
妹子生得鳳凰身，
眼角尖尖會割人， 好比六月狗爪豆， 唔曾浸淨會魂人。
妹子生得好人才，
哪邊風水管下來， 眼拐（波）打來鐮刀樣，
割人心肝冇血來。
阿妹人才蓋一村，
兩排牙齒白如銀。 講話好比黃鶯叫， 走路好比風送雲。
標致妹子觀音身，
爾話冇情又有情。 斜眼看人唔開口， 烏雲映日熱死人。
阿妹生得真真靚，
相貌又好又後生。 好比十五月光樣， 哪有缺角被郎嫌。
妹子生得系苗條，
頭上梳等招郎毛， 看到哥來笑一笑， 未曾開口面先燒。
阿妹生得白漂漂，
矮唔矮來高唔高。 牙齒好比高山雪， 歌聲好比畫眉鳥。
妹子生得靜柔柔，
低頭微笑半含羞。 含蕊鮮花嬌又嫩， 樣般怪得阿哥求。
人才又好又大方，
阿妹頭上桂花香。 牙齒好比瓜仁樣， 面貌好比觀音娘。
桐樹打子桐葉遮，
妹子出門涼帽遮， 風吹涼帽葉葉轉， 眼線打來牡丹花。
親哥英俊妹斯文，
兩家人才蓋一村， 十八銅錢兩份擺， 阿哥九文妹九文（久聞）。
老妹生得真斯文，
洋氈遮卵蓋一春（村），
紅糟拿來煮豆腐，
又紅又白得人魂。
妹子好比月鴿形，
厲害就在眼珠仁， 上上下下斜眼看， 熱死幾多風流人。
食盡生果唔當梨，
看盡妹子唔當爾， 赤蘗打花千百朵， 唔當薔薇開一枝。
（3）開口難
三步行來兩步停， 一心想同妹交情， 新打剪刀難開口， 六月火爐難近身。 牆內種花牆外開， 花高牆矮伸出來， 哥想上前剪一朵， 新打剪刀口難開。
心想上天天又高，
心想連郎面又燒， 鐵打荷包難開口， 石上破魚難落刀。
初來山上剷草皮，
唔知樣般放畚箕， 阿哥同妹初相識， 唔知樣般開語言？
阿哥人才難得有，
恰似深山紅石榴， 心想同爾結相好， 未曾開口就怕羞。
門前桐樹開白花，
大風吹下滿地下， 妹系連郎愛開口， 莫作楊梅開暗花。
一樹楊梅半樹花，
哥系男人膽愛雄， 交情愛哥先開口， 女人開口面會紅。
日日落雨望天晴，
新作塘頭唔敢行， 單竹架橋唔敢過， 心裡想爾唔敢聲。
蝴蝶採花入花園，
哥想連妹先開言， 世上只有藤纏樹， 唔曾見過樹纏藤。
（4）初學戀愛
急水撐船難上灘， 初學連郎甚艱難， 心頭好比擂戰鼓， 面上好比火燒山。
日頭一出紅啾啾，
白鶴落田篤湖鰍， 湖鰍尋食唔怕死， 妹愛連郎唔怕羞。
白鶴落田腳柬長，
莫怪阿妹唔大方， 初學連郎妹冇膽， 嫩草唔曾經過霜。
妹愛連郎莫怕羞，
眉開眼笑見朋友， 交情唔單涯兩個， 抬頭一看天下有。
一心想同妹交情，
初學連妹還怕人， 針筒打米落鑊煮， 唔知幾時正上升（身）。
（5）唔知有緣麼
新打茶壺七寸高， 人人都話真難挑， 人人都話真好錫（惜），
到底唔知有鉛（緣）麼？
新打茶壺錫撈鉛，
阿哥話錫妹話鉛， 阿哥話鉛妹話錫， 總愛有錫也有鉛。
蘭磐石上種條桃，
唔知桃子有打麼， 桃樹頭下遇到妹， 唔知同爾有緣麼？
絲線織網丟落河，
唔知網裡有魚麼？ 阿哥人材妹中意， 唔知哥會想妹麼？
急水打魚盡網丟，
有魚冇魚也愛收， 系涯食祿天注定， 系涯姻緣前世修。
河裡撒網盡力丟，
有魚冇魚慢慢收， 阿哥連妹心莫急， 團圓日子自然有。 SG6-10
（6）唔知哪個好交情
兩對耳環一樣重， 唔知哪對真正金， 兩個阿哥一樣好， 唔知哪個真正心？
兩條綠竹一樣長，
唔知哪條正竹娘？ 兩個阿妹一樣好， 唔知哪個正情長？
三條松樹透天庭，
唔知哪條落松仁（脂）？ 三個阿哥柬高大， 唔知哪個好交情？ 三條樹子般般柳（直), 唔知哪條下潮州，三個妹子般般好，唔知哪個情較有？
兩個阿哥柬熱人，
唔揀相貌單揀情， 打開庵門看佛面， 究竟哪個真正神（誠）？
上塘魚子跳下塘，
唔知哪口水正涼？ 前面柬多好妹子， 唔知哪隻情正長？
好久唔曾搭船上，
唔知船上好風光， 柬多阿妹哥唔識， 唔知哪隻好商量？
好久唔曾搭船下，
唔知河裡柬多沙， 柬多阿哥妹唔識， 唔知開口問哪儕？
燈草拿來織雞籠，
雞爬狗蹶心就溶， 八面蘇鑼共下打， 唔知哪隻正好銅（同）？
欖子好食兩頭尖，
唔知落地哪頭生， 老蟹兩邊都有腳， 唔知落地哪邊行?
（7）求愛
嶺崗頂上種條松，
冇依冇靠樣得濃， 單只筷子跌落地， 一心望妹結成雙。
因為冇米割青禾，
因為冇船正下河，
因為冇雙來連妹，
問妹有心向郎麼？
大路蕩蕩好跑馬，
路邊井水好泡茶， 唔想細茶衝滾水， 只想同妹共一家。
三兩豬肉四兩鹽，
涯今問妹咸唔咸，（行）
石膏豆腐唔放味，
涯今問妹淡唔淡？
唔曾相識共凳坐，
跟講起來話頭多， 門前生條攔路竹， 今番看來倒較多。
河邊柳樹葉拖拖，
妹掀衫尾郎貼坐， 阿哥問妹戀唔戀， 低頭含笑肯較多。
松樹打子一球球，
到處青山有水流， 到處青山有水轉， 樣般阿妹柬難求？
因為冇燒拆園蘺，
因為冇米剪谷枝， 因為冇糖來蘸味， 因為冇雙來連爾。
石壁做屋嶇對嶇，
因為屋瓦蓋櫓箕， 因為冇床睡板凳， 因為冇雙來連爾。
嶺崗頂上一坵田，
冇塘冇圳靠青天， 冇娘雞子靠白米， 單身阿哥靠嬌蓮。
有柬好來冇柬賢，
有柬賢來結同年， 阿哥真心來相愛， 米刷上夾就團圓。
涯渴涯困涯懶聲，
花邊貼腳涯懶拈， 總愛妹子話一句， 上天冇路涯會行。
七月七日銀溪河，
傳書搭信有到麼？ 海水也有回頭浪， 妹子有心向郎麼？
（8）未及時
隔遠看到禾表枝， 想爾救餓未及時， 只見朗花唔入米， 看爾朗花到幾時。
上山唔得半山企，
只見早禾正表枝， 樣得禾黃食新米， 樣得同妹結夫妻。
正月做田講落秧，
唔到夏至苗唔黃， 阿妹好比早禾穀， 節氣唔來唔登場。
南蛇唔大唔過崗，
火船唔大唔出洋， 阿妹還繫魚毛柢， 唔敢同哥漂大江。
茶子打油仁唔烏，
唔貪茶油貪茶枯， 阿哥也還年紀少， 唔敢來交細阿姑。
唔到十五月唔光，
唔到夏至禾唔黃， 妹子還繫年紀小， 唔敢同哥說短長。
妹子門前花未開，
爾也唔好緊纏來， 等到來年花開日， 兜凳上棚涯冇梯。（推辭）
（9）失戀自慰
爾唔連涯有人連， 深山樹木有藤纏， 黃蜂唔曾種花樹， 滿山都係拒花園。
河唇洗衫石上踞，
冇爾番鹼洗茶枯， 先日冇爾也愛過， 沙煲裝酒唔在壺。
連爾唔到心唔焦，
爾也唔使柬精刁， 門前種有檀香樹， 唔使求爾做香包。
冇爾石炭會燒柴，
冇爾渡船會搭排， 阿哥種有梧桐樹， 自有鳳凰會飛來。
連爾唔到冇相干，
柬好老酒也會酸， 柬好紅花也會謝， 柬好人情也會斷。
連爾唔到冇相干，
爾比棉被冇較暖， 爾也唔係白米飯， 唔使求爾過三餐。
爾系唔肯唔求爾，
到處山崗有草皮， 手捉黃鱔砧上剮， 割斷肚腸丟撇拒。
爾系愛斷儘管斷，
冇情阿哥冇相干， 阿妹好比大河水， 冇爾圳水唔怕旱。
（10）哥是綠葉妹是花
哥是綠葉妹是花, 哥是綾羅妹系紗， 哥是高山石岩水， 妹系山中細嫩茶。
白糖柬甜甘蔗來，
泉水柬清石縫來， 哥是白糖妹是水， 白糖見水心花開。
妹子好比蜘蛛形，
蜘蛛牽絲會纏人， 阿哥好比蝴蝶樣， 被爾纏倒難脫身。
妹子好似海棠花，
海棠開在石岩下， 阿哥好比石岩水， 常年月久蔭妹花。
阿哥一崗妹一崗，
哥係日頭妹月光， 哥係日頭妹曬穀， 妹系月光哥透涼。
桂樹開花滿園香，
菊花開在桂花旁， 哥是桂花妹是菊， 任人去講也清香。
石頭柬硬打得開，
打開石頭燒石灰， 郎是石灰妹系水， 石灰見水心花開。
妹在這崗郎那崗，
妹系子鴨郎系姜， 樣得子鴨同姜炒， 兩人撈得共盤裝。
連妹唔到發眼烏，
鴉鵲來尋山鷓鴣， 妹系鷓鴣郎系鵲， 樣得行前嬲一晡。
妹子生得好人材，
好比月光走出來， 妹系月光哥係日， 唔知幾時做一堆。 妹系花瓶郎系花，柬好花瓶愛有花，柬好花瓶冇花插，唔當同郎共一家。
哥系天上一條龍，
妹系地下花一叢， 龍唔翻身唔落雨， 花唔淋雨開唔紅。
妹在這崗郎那崗，
兩人熱法正難當， 哥系雞春妹鴨蛋， 樣得打爛共盤裝。
阿哥姓梁妹姓梁，
雖然共姓各一方， 哥系西風妹系雨， 西風透雨涼對涼（兩）。 門前梨樹曬花鞋， 問妹連涯唔連涯， 剪刀同布放落桌， 隨爾心下去勘裁。
山歌又好聲又嬌，
月弦來和九龍簫， 妹子姻緣有涯份， 玉石來造洛陽橋。
新做大屋四四方，
做了上堂做下堂， 做了三間又兩套， 問妹愛廊唔愛廊（郎）？
東門行出白衣庵，
又種桔子又種柑， 三皮茶葉泡碗茶， 問妹心頭淡唔淡（貪）？
SG11-15
（11）貪嫩正來纏
山歌愛唱妹愛連， 妹系青春郎少年， 竹筍拿來做豆架， 兩家貪嫩正來纏。
砍柴愛砍山布荊，
又貪好燒又貪輕， 連妹愛連年嫩女， 又貪伶俐又貪靚。
風吹竹葉皮皮青，
妹愛連郎趕後生， 過多一年老一歲， 唔比春草年年青。
十七十八正當時，
百花開早唔開遲， 竹筍出尾節節老， 今唔風流等幾時。
有心連妹莫來遲，
六月禾花會過時， 禾花謝落長江水， 哥系唔留打走哩。
火煙相蓋屋相連，
阿哥同妹上下年， 阿哥十八妹十七， 八七十五月團圓。
月子彎彎在半天，
船子彎彎在河邊， 哥愛搭船趕大水， 妹愛連郎趕少年。
食肉愛食夾心靚，
連妹愛連二十零， 日里知得郎辛苦， 夜裡知得郎曉冷。
（12）報家門
一條花樹路邊生， 花又紅來葉又青， 阿哥唔識妹名姓， 手攀花樹問花名。
高山打鼓遠傳聲，
妹子住在九龍坑， 一把長弓系涯姓， 五色祥雲系涯名。
阿哥有日來上下，
直頭直路轉我家， 門前唔曾種有勒， 屋後唔曾裹籬笆。
妹子問涯住哪裡，
家住高坑兩隔離， 門前種有柿子樹，
大門面向日落西。
麻餅好食肚裡黃，
妹子住在五口塘， 阿哥住在嶺頸水， 連爾唔到心唔涼。
（13）莫嫌涯
茶油煮菜莫嫌齋， 有心連妹莫嫌涯， 手指伸出有長短， 蓮花出水有高低。
門前梨樹曬花鞋，
妹係有心莫嫌涯， 總愛妹子有心向， 千斤擔子涯會kai
別人雖嫩涯唔貪，
阿哥雖老涯唔嫌， 阿哥好比荔枝樣， 雖然皮皺肉裡甜。
白白嫩嫩涯唔貪，
烏烏赤赤涯唔嫌， 阿哥好比當梨樣， 越烏越赤心越甜。
中了涯意涯唔嫌，
苦瓜醃生涯喊甜， 燈草跌落鹽水缽， 入了伢心樣得淡。
（14）唔嫌阿哥窮
妹子唔嫌阿哥窮， 阿哥好比月月紅， 九冬十月霜雪過， 春水淋頭葉會濃。
赤米煮粥滿鑊紅，
心願嫁郎唔怕窮， 總愛兩人情意好， 郎系討食妹挽筒。
阿哥唔係命裡窮，
怨得阿哥運未通， 有朝一日時運轉， 南蛇脫殼變成龍。
桔子好食皮鮮紅，
結成相好唔怕窮， 年三十日冇米煮， 兩人牽手笑融融。
高山點火唔怕風，
大海航行唔怕龍， 阿哥戀妹唔怕死， 妹子戀哥唔怕窮。
三間當舖涯唔愛，
情願跟郎挑石灰， 左肩拋到右肩轉， 鍥牙線齒心花開。
郎心甘來妹心甘，
情意同郎睡稈棚， 情願同郎喝粥水， 情願同郎食糠羹。
（15）連妹唔使錢(對唱）
男：
好牛食草唔使牽，
好馬出陣唔使鞭， 好石磨刀唔使水， 好妹連郎唔使錢。
女：
阿哥講話樣柬顛，
哪有連妹唔使錢， 三歲孩兒脫乳咀， 哪人帶打俾爾連？
男：
別人打坎用田刀，
阿哥打坎用手摩， 別人連妹愛錢使， 阿哥連妹用山歌。 女：
有好歌聲冇好歌，
山歌爾莫唱柬多， 山歌唱得阿妹到， 耕田唔使用牛拖。 男：
雞公相打腳先來，
唔知阿妹柬愛財， 阿哥唔係搖錢樹， 常年月久哪裡來？ 女：
阿哥講話樣柬狂，
哪有搓飯唔使糖， 哪有餵雞唔使米， 哪有蒸酒唔使娘（釀）？ 男:
愛銀愛錢涯就冇，
阿哥還繫葉下桃， 九月重陽放紙鷂， 涯今問妹高唔高（交）？ 女：
有錢有勢涯唔挑，
愛哥人窮志氣高， 苧麻擰線放紙鷂， 長情長線望郎高（交） |
沒有留言:
張貼留言