客家山歌（五）

                                                
客家山歌（五）

2012-3-19 17:02 |發布者: 杭網二號|查看: 837 |評論: 0 |來自:上杭光中軒

摘要 : (61)心唔休山歌唔唱唔風流，豬肉唔煎唔出油，梧桐落葉心唔死，連妹唔到心唔休。櫓箕割了心還在，五更落露生回來，鷂婆入村叼雞子，今番唔到下番來。唔過重陽唔落霜，唔過霜降禾唔黃，唔到黃河心唔死...
(61)心唔休
 山歌唔唱唔風流，
豬肉唔煎唔出油，
梧桐落葉心唔死，
連妹唔到心唔休。

櫓箕割了心還在，
五更落露生回來，
鷂婆入村叼雞子，
今番唔到下番來。

唔過重陽唔落霜，
唔過霜降禾唔黃，
唔到黃河心唔死，
唔同哥愛心唔涼！

連爾唔到心唔灰，
今生唔到下生來，
阿哥好比梁山伯，
阿妹好比祝英台。
　
 (62)吾使郎多言
桐樹開花朵朵連，
高車吊水蔭旱田，
好田唔使高車水，
好妹唔使郎多言。

好香唔使幾多枝，
好酒唔使幾多杯，
神靈唔使多香紙，
好妹唔使多語言。

豬肉煮酒唔使湯，
飯湯洗衫唔使漿，
分明妹子唔使講，
有心栽花花自香。

連妹一事愛分詳，
唔好打卵就見黃，
脫桌食飯莫鬥緊，
老鼠遊桁慢上樑（商量）。
　
 (63)難測爾心腸
欖核貼頭唔端方，
湖洋蒔田唔對行，
船頭湯雞失內臟，
水深難摸爾心腸。

渾水過河唔知深，
唔知阿哥乜樣心，
萬丈深潭難打底，
錫打茶壺假鍍金。

先日當涯花柬香，
今日當涯爛籮筐，
神仙難​​測爾心事，
曲尺難量爾心腸。

新做民船尾刁刁，
一心同妹出外漂，
未曾測到妹心事，
水急唔敢亂開篙（交）。

上塘菱角下塘蓮，
一心都想嫩嬌蓮，
半夜燙豬冇火看，
問妹心腸在哪邊？
　
(64)愛嫁老實伯
食飽夜飯嬲月光，
看等鯉魚透水上，
鯉魚專尋湧水角，
妹子專尋老實伯。

割草愛割老草頭，
做屋愛砌石簷頭，
嫁郎愛嫁老實伯，
唔會貪花到處遊。

種樹愛種鬆樹秧，
連郎愛連老實郎，
松樹正系常青樹，
老實阿哥情過長。
　
 (65)冇錢詐耳聾
有錢買酒酒壺重，
冇錢買酒酒壺空，
有錢問妹聲聲應，
冇錢問妹詐耳聾。

有錢有食笑嘻嘻，
一次冇錢詐唔知，
先日有錢心肝肉，
今日冇錢死禿尾。

荒墳種菜草先生，
冇錢戀妹系過爭，
手拈花邊六錢八，
裡擺就被妹看輕。

冇情妹子唔好交，
風吹禾草里面刀，
今日有錢今日交，
一番冇錢面就敖。
　
(66)假情假意
落雨出星假天晴，
假情假意同涯行，
面前放有豬肉碗，
假意來夾蘿蔔生。

假情假意來交情，
番番來到唔應承，
口裡講出蓮花樣，
水打棺材溜死人。

假情妹子唔好交，
唔當自家打單鳥，
東園改竹西園種，
莖系唔死葉也燥。

十月來著湯坑機，
假意熱情涯也知，
黃酒來充夾酒賣，
好歹吞在涯肚裡。

紙做豬頭哄鬼神，
看爾唔係真情人，
咀裡就話同涯好，
心肝還是掛別人。

玻璃眼鏡假水晶，
十三兩秤假正斤（經），
口含燈草唔落肚，
看爾唔係食（實）心人。
　
(67)冇情吾好交
松樹打子尾上天，
冇情妹子枉費連，
高山來望涼井水，
肚渴樣得近身邊。

冇情妹子唔好交，
蒸酒冇娘枉涯勞，
麥須磨粉冇面見，
蔗葉蓋屋唔到茅（冇）。

曬穀落雨加早收，
冇情妹子就愛丟，
下田去拈田螺食，
冇端撿到氣來抽。

樣般阿妹柬冇情，
過月雞蛋來送人，
打落鍋頭黃就散，
未曾落肚頭就暈。 二月蒔田秧唔長，

五月割禾半青黃，
連妹連了冇情義，
急到阿哥半癲狂。
 
冇情妹子唔好交，
恰似山中雪打蕉，
恰似山中雪打樹，
條條斷到半中腰。

松毛點火一時光，
冇情妹子情唔長，
六月買到爛扇把，
緊撥心頭也唔涼。

冇油煮菜唔殺青，
冇情阿哥唔好行，
石膏豆腐落鍋煮，
面上就熱心裡冷。

行等行等冇來往，
貓公上圩會冇行，
早知阿哥冇情義，
早做橫屋唔愛廊（郎）。

三月蒔田滿段青，
六月割禾冇對成，
早知阿哥情義短，
花邊貼腳涯唔行。
　
 (68)洗碗有相磕
 問妹唔聲真真奇，
哪句言語得罪爾，
句把言語妹愛受，
洗碗也有相磕時。

爾也唔使恨啾啾，
半講半笑人人有，
口水吐落長江內，
言語唔著水照流。

妹子唔使氣沖衝，
心中有事放從容，
爾有情理慢慢講，
絲線牽得石牛動。

妹也唔使恨啾啾，
洗碗相磕時時有，
生柴拿來做火種，
涯今唔著妹莫丟。

親親熱熱兩公婆，
床頭打交床尾和，
公藪雞子有相打，
心裡想開事就冇。
　
 (69)勸解
有愁有急愛想開，
莫來愁急做一堆，
藤斷自有篾來駁，
船到灘頭水路開。

爾莫鬱來爾莫愁，
自有云開見日頭，
自有水清見到底，
自有春光在後頭。

貧窮唔使苦蹉磋，
地闊還有天來遮，
抬起頭來天柬闊，
窮苦唔單涯兩儕。

落得雨多總會晴，
米穀貴了總會平，
水打石橋會轉側，
阿哥總有好運行。

阿妹唔使苦啾啾，
竹筍逢春有出頭，
月缺也有團圓日，
安樂日子總會有。

涯勸妹子莫多疑，
莫嫌阿哥得運遲，
臘蔗想長多一節，
花開有日運有時。

阿哥落運妹莫愁，
柬好棉紗有結頭，
柬好月光有缺角，
柬好草崗有瘦牛。

勸妹心頭愛想開，
莫來愁急做一堆，
阿哥好比退冬樹，
一到交春葉又開。
　
 (70)傷離
 買梨莫買蜂咬梨，
心中有病冇人知，
因為分離故親切，
誰知親切轉傷梨。

催人出門雞亂啼，
送人離別水東西，
挽水西流想冇法，
從今不養五更雞。

當梨花開滿山香，
當梨花下送情郎，
莫話當梨花好看，
想到當梨割斷腸。

竹篙曬衫拉拉橫，
保佑阿哥走唔成，
保佑月曆冇日子，
保佑水淺冇船行。

二丈八布做耍衣，
囑郎年節愛早歸，
燕子含泥歸本藪，
莫學蝴蝶滿天飛。

阿哥出門妹莫愁，
人千人萬坐船頭，
絲線拿來做衫著，
鉤線密縫望回頭。
　
 (71)送郎
 郎愛出門妹難留，
一邊送來一邊愁，
絲線打結吞落肚，
冇人能解涯結頭。

送郎送到門段下，
包袱遮子妹來拿，
十日半月愛來信，
三年兩載愛回家。

送郎送到大路頭，
囑郎回時買枕頭，
買枕愛買鴛鴦枕，
莫買單枕各一頭。

送郎送到五里亭，
再送五里難捨情，
再送五里情難捨，
十分難捨有情人。

送郎送到大橋頭，
兩頭河水急秋秋，
兩頭絲線打死結，
人情難捨哥難丟。
　

 送郎送到石子崗，
石子觸腳苦難當，
觸就觸在郎腳上，
痛就痛在妹心腸。

送郎送到牛斗崗，
郎跌腳趾受了傷，
扯幅羅裙包腳趾，
親哥痛肉妹痛腸。

送郎送到冷水窩，
囑郎冷水莫食多，
冷水食多肚會疾，
行到半路哪人摩。

送郎送到上排畬，
山里禾苗葉些些，
禾苗冇水難打穀，
妹子冇郎難當家。

送郎送到大碼頭，
滿江河水向東流，
一對鴛鴦少一隻，
一隻孤單水上浮。

送郎送到渡船頭，
腳踏渡船浮對浮，
哪有利刀能割水？
哪有利刀能割愁？

行繡荷包兩面紅，
一面獅子一面龍，
獅子上山龍下海，
唔知哪日正相逢。
　
 (72)送郎過番
一下種竹望上天，
誰知緊大尾緊彎，
一心同妹望偕老，
唔奈家貧去過番。

阿哥出門去過番，
洋船等到粵海關，
妹子有話當面講，
下番搭信較艱難。

妹送親哥上火船，
汽笛一響割心肝，
下番係有水客轉，
搭銀搭信報平安。

汕頭出海七洲洋，
七日七夜水茫茫，
行船三日唔食飯，
記妹言語準乾糧。
　
 (73)阿哥走後
汶水長流有日清，
阿哥走後難相親，
路遠迢迢冇處問，
朝見日頭夜見星。

阿哥走撇妹痛腸，
三餐茶飯唔想嘗，
緊食燒茶肚緊渴，
緊緬親哥夜緊長。

阿哥走撇妹寒酸，
秤砣跌撇剩秤桿，
秤桿拿來挽內臟，
郎就掛心妹掛肝。

有哥在家妹溫暖，
冇哥在家妹寒酸，
三年五載冇面見，
床下目汁好行船。

河水渾渾河岸崩，
親哥走後隔重天，
三歲孩子脫乳咀，
一覺醒來一覺跟。

阿哥走後妹心愁，
三朝七日唔梳頭，
聽到阿哥寫信轉，
髻尾梳到黏肩頭。
　
 (74)送妹歸
 妹子愛歸只管歸，
深山大樹已伸尾，
砍條大樹開船板，
做條新船送妹歸。

鳥子吵林日落西，
三魂七魄送妹歸，
轉去家中唔使苦，
系生系死哥陪爾。

送妹送到茶亭下，
放下擔子來食茶，
囑妹食茶愛洗碗，
切莫食人口涎渣。

妹子愛轉慢慢行，
風吹芒草爾莫驚，
深山鳥叫爾莫怕，
阿哥魂魄伴爾行。

妹子愛歸慢慢歸，
來有日子轉有期，
腳步送爾唔到屋，
心肝送爾一千里。

竹篙打水兩邊開，
問妹轉去幾時來？
有人來往搭封信，
冇人來往託夢來。
　
 (75)掛念
 柬久唔曾見心肝，
人冇見面心冇安，
墨水拿來吞落肚，
時時掛念（染）涯心肝。

睡目唔得到雞啼，
手拿剪刀撿布裁，
裁到半夜打呃嚏，
莫非心肝想念涯？

日日落雨攪大風，
唔得天晴見天公，
好久唔曾見妹面，
心肝愁碎眼愁蒙。

行唔安來坐唔安，
時時掛念嫩心肝，
念爺念[女哀]有時日，
掛念心肝冇時斷。

腳踏高山十二重，
高山頂上有好風，
好風吹在郎身上，
好妹掛在郎心中。

娥眉月子彎鉤鉤，
兩個星子掛兩頭，
郎心掛在妹心上，
妹心掛在郎心頭。

姜公釣魚石上坐，
一心掛念那條河，
阿哥有心掛念妹，
妹子冇心掛念哥。