客家山歌（三）

                                                                
客家山歌（三）

2012-3-19 16:59 |發布者: 杭網二號|查看: 953 |評論: 0 |來自:上杭光中軒

摘要 : （16）有心愛架橋急水灘頭難開蒿，妹係有心愛架橋，架座金橋俾郎過，永久記得爾功勞。山歌愛唱情愛交，真心連妹唔使橋，燈草搭排爾敢過，妹送金簪做槳搖。好花開在湖心亭，冇船冇槳難近身，若得妹子...
（16）有心愛架橋
急水灘頭難開蒿，
妹係有心愛架橋，
架座金橋俾郎過，
永久記得爾功勞。

山歌愛唱情愛交，
真心連妹唔使橋，
燈草搭排爾敢過，
妹送金簪做槳搖。

好花開在湖心亭，
冇船冇槳難近身，
若得妹子成雙對，
深深感謝架橋人。

隔岸看郎妹心焦，
又冇渡船又冇橋，
心想架橋俾郎過，
怕郎冇心空架橋。

甜菜來醃蘿蔔星，
酸唔酸來甜唔甜，
單竹架橋牽妹過，
問妹敢行唔敢行？

哥在那邊妹這邊，
隔河兩岸樣得前，
絲線架橋浮水面，
爾系敢過涯敢連。

敢放白鴿敢響鈴，
敢唱山歌敢大聲，
燈草拿來搭橋過，
有心相愛敢同行。

風吹門板兩邊開，
講過愛來就愛來，
燈草架橋爾愛過，
竹葉撐船爾愛來。
　
 （17）挑逗
 隔山唱歌聽唔真，
隔村戀妹難近身，
妹子好比雲下月，
陰陰啞啞（暗）熱死人。

對面唱歌是哪人？
日頭映眼看唔真，
系涯親哥過來嬲，
爾莫假作兩邊人。

新做大屋白瑩瑩，
看等金雞瓦上行，
是我金雞食我米，
是我嬌蓮聽我聲。

隔遠聽到妹歌聲，
唔知妹子有幾靚，
花邊拿來石上跌，
聽爾聲音有八成。

清水池塘一對鵝，
搖搖擺擺來唱歌，
好比哥妹成雙對，
一個唱來一個和。

一對鴛鴦塘邊企，
雙雙落塘雙雙飛，
有情愛學鴛鴦樣，
朝晨同出暮同歸。
　
（18）芙蓉愛葉遮
 隔遠看見妹上崗，
搖搖擺擺過山塘，
柬大山塘冇蓄水，
柬好阿妹冇嫁郎。

妹子生得一枝花，
樣好單身屈自家？
柬好芙蓉愛透水，
柬好芙蓉愛葉遮。

深山竹筍報嫩芽，
一出泥皮望葉遮，
大膽出頭天地闊，
莫來屈頭害自家。

老妹生得一枝花，
柬好紅花冇葉遮，
一心都想上去摘，
又怕上樹唔得下。

妹子好似海棠花，
海棠開在石岩下，
阿哥好比石岩水，
常年月久蔭妹花。

妹系鮮花正當開，
哥系蜜蜂千里來，
蜜蜂見花團團轉，
花見蜜蜂朵朵開。

蝴蝶飛入百花園，
看過芙蓉看牡丹，
百樣鮮花涯唔採，
單採一枝白玉蘭。

正月過了二月來，
處處花園有花開，
別樹有花涯唔採，
此樹冇花等到開。

一條花樹葉柬濃，
可惜生在勒縫中，
若係生在當陽處，
雨水調勻花更紅。

日頭又烈風又燒，
柬好紅花也會焦，
有心爾愛擔水蔭，
莫來看等任拒燥。

妹子好比一盆花，
唔肯俾人端過家，
天晴涯會擔水蔭，
日烈涯會脫衫遮。

一條溪水綠油油，
有朵鮮花水上浮，
哥係有心收花起，
莫來看等任拒流。

一朵紅花在水中，
想去探花水又深，
因為探花跌落水，
就係浸死也甘心。

深山肚裡一株梅，
經霜捱雪紅花開，
明知深山有老虎，
因為尋梅捨命來。

桃花開了李花開，
阿妹問涯哪裡來，
阿哥好比蜜蜂樣，
因為花香隨風來。

花香自有蜂飛來，
妹好自有人做媒，
自有紅娘來牽線，
自有阿哥望做堆。
　
 （19）阿哥愛妹行
 嶺崗頂上一丘禾，
風吹日曬旱過多，
柬好禾苗冇谷打，
柬好阿哥冇老婆。

松樹頭下剮魚身，
郎話酸來妹話甜，
柬好魚身愛酸醋，
柬好阿哥愛妹行。

郎在上丘妹下丘，
兩人眼線緊去丟，
保佑上天落大雨，
打崩田塍做一丘。

彩雲一出天就光，
好花一開滿園香，
六月天時熱過火，
阿妹一來心就涼。

阿哥搭信妹會來，
路上勒頭愛鉤開，
路上勒頭唔鉤撇，
扯爛衫褲麼人賠。

蜜蜂釀糖望花開，
哥想成雙望妹來，
蜜蜂靠花哥靠妹，
塘里蓮花靠水栽。

哥愛採花入花園，
有心連妹愛行前，
世上只有船靠岸，
唔曾看過岸靠船？
　
（20）想爾
手揸豆葉十二皮，
一日想爾十二時，
一月想爾三十日，
年頭想爾到年尾。

想爾一番又一番，
一日唔得一日滿，
上晝唔得午時過，
下晝唔得日落山。

三步行來兩步企，
三餐食飯都想爾，
大石底下生竹筍，
幾多暗想爾唔知。

日里想爾頭低低，
夜脯想爾到雞啼，
流盡幾多暗目汁，
枕頭席子生烏雞（黴）。
　
因為想爾想到暈，
火煙上天涯話雲，
礱穀涯話雷公響，
吹風涯話妹拍門。 因為想爾想到昏，

鵝卵石子當作銀，
一日三餐扛起飯，
只曉笑來唔曉吞。
　
因為想爾想到狂，
洗身唔曉入浴堂，
食飯唔知哪張桌，
睡目唔曉上眠床。
　
因為想爾想到痴，
六月天光蓋棉被，
九冬十月撥扇子，
天晴雨斂著蓑衣。

因為想爾想到顛，
石頭瓦片當作錢，
三月清明作過節，
九月重陽作過年。

因為想爾想得多，
面前有凳唔曉坐，
行路唔知高低坎，
吃飯唔知谷沙多。

日想夜想想親哥，
唔得團圓共凳坐，
朝晨想到月光出，
夜裡想到日上坡。

日出東邊落在西，
妹子日夜都想爾，
鯉魚食到蝦公腳，
幾多委屈冇人知。
　
 （21）想情郎
 日頭出山天大光，
妹子出門洗衣衫，
一條竹篙十二想，
想上想下想情郎。

新做眠床四四方，
四面橫屏畫鴛鴦，
單身妹子床上睡，
翻去翻轉想情郎。

柬久唔曾入菜園，
蕹菜長過番薯藤，
柬久唔曾見哥面，
心肝脫得十二層。

妹想親哥又一年，
幾多月缺又月圓，
月缺還有團圓日，
等哥團圓到哪年？

妹想情郎黃昏時，
百鳥歸巢雙雙飛，
百般鳥雀有雙對，
妹今同郎各東西。

妹想情郎月半天，
枕邊翻滾淚漣漣，
明月照在妹身上，
魂魄落在郎身邊。

想郎想到天大光，
頭暈眼花爬起床，
著身衫褲少鈕扣，
手摸頭髮代梳妝。

門前綠竹想想長，
竹林底下想情郎，
竹林底下許哩願，
唔知幾時結鴛鴦。
　
（22）望郎來
 嶺崗頂上一株梅，
手攀梅樹望郎來，
啊娘問涯望乜個，
涯望梅花幾時開。

門前種有一株梅，
手攀梅樹望郎來，
十朵梅花開九朵，
還有一朵等郎開。

雙扇大門單扇開，
踏出踏入望郎來，
腳踏竹頭望生筍，
手攀花樹望花開。

正月裡來梅花開，
舊年過哩新年來，
風吹梅花花落地，
梅花香里望郎來。

二月裡來柳葉開，
柳樹開葉燕歸來，
多情柳樹隨風舞，
多情阿妹望郎來。

三月裡來桃花開，
妹話摘桃入園來，
入園唔係摘桃子，
手攀花樹望郎來。

四月裡來荷花開，
手棒香茶出房來，
紅荷白荷嬌又嫩，
荷池邊上望郎來。

五月裡來榴花開，
妹子打扮出園來，
小小涼亭好飲酒，
篩杯美酒望郎來。

六月裡來禾花開，
禾花謝了三伏來，
禾葉尖尖招露水，
十指尖尖望郎來。

七月菱角花又開，
燕子雙雙飛進來，
牛郎織女相聚會，
阿妹門前望郎來。

八月海棠花又開，
天上明月照下來，
明月多情照塘水，
塘邊洗衣望郎來。

九月裡來菊花開，
手提燒酒進房來，
房中獨飲菊花酒，
枕上孤單望郎來。

十月裡來霜花開，
妹在房中繡花來，
繡出好花街上賣，
街頭街尾望郎來。

十一月來雪花開，
手拿掃子掃雪來，
手拿掃子掃開雪，
掃開大路望郎來。

十二月裡燈花開，
枕上相思結難開，
鴛鴦枕上冇雙對，
夜半三更望郎來。
　
 （23）等情哥
 過了一窩又一窩，
風吹竹​​子尾拖拖，
竹子低頭承露水，
妹子低頭等情哥。

高山頂上做茶亭，
茶亭裡面等情人，
坐了幾多冷石板，
問了幾多過路人。

日頭落山坳裡黃，
坐在坳裡等情郎，
千人萬人都過盡，
唔見親哥想斷腸。

隔遠看到親哥來，
害涯心頭花花開，
行前看到又唔係，
千斤石板壓下來。

等郎等到五更頭，
一冇燈心二冇油，
拔下頭髮做燈草，
流出目汁做燈油。

燈盞冇油火燒心，
等郎等到五更深，
一雙花鞋都做好，
等郎唔來枉費心。
　
（24）嬲到石頭浮起來
坐下來，嬲下來，
嬲到兩人心花開，
嬲到雞毛沉落水，
嬲到石頭浮起來。

上山割草心莫急，
日頭還有三丈高，
一丈用來同爾嬲，
兩丈用來割櫓箕。

柬久唔曾入菜園，
苦瓜豆角層壓層，
柬久唔曾同妹嬲，
肚裡言語講唔完。

嬲了一番正一番，
下番愛嬲較艱難，
一來又怕天落雨，
二來又怕妹唔閒​​。

同妹緊嬲心緊痴，
兩人嬲到唔肯歸，
手拿利刀砍竹子，
撐穩日頭莫落西。

妹莫轉來妹莫歸，
嬲到深山竹伸尾，
嬲到深山竹好倒，
做頂涼帽送妹歸。
　

 人情柬好系難擔，
唔曾嬲夠心唔甘，
冇鹽擦菜心唔死，
還愛同郎嬲下添。
　
欖樹打花花攬花，
郎就攬上妹攬下，
掀起衫尾等郎攬，
等郎一攬就回家。
　
（25）八月十五看月
八月十五看月華,
郎出月餅妹出茶，
郎食月餅甜落肚，
妹食細茶開心花。
　
八月十五看月光，
看等鯉魚照水上，
鯉魚唔怕漂江水，
連妹唔怕路途長。

八月十五是中秋，
冇個月餅送朋友，
冇錢交了有情妹，
永久人情唔會丟。

八月十五月團圓，
粉絲炒麵纏對纏，
妹子有情郎有義，
交條人情萬萬年。

中秋月餅包糖心，
同郎緊嬲情緊深，
牽手來看銅盒水，
星子連唇月（熱）在心，

八月十五月光光，
妹子同哥各一方，
柬好月光冇眼看，
柬好月餅冇心嘗。
　
（26）連郎難
想起連郎甚艱難，
好比鯉魚上急灘，
上灘就怕鷺鷥劫，
下灘又怕網來纏。

一朵紅花在高山，
山又高來路又彎，
想變蜜蜂飛過去，
蜘蛛牽網又來攔。

講起連郎妹心慌，
一出一入心提防，
深山老虎妹唔怕，
最怕叔公暗中藏。

因為連郎愁了愁，
叔公日夜目牛牛，
這個正話索來綁，
那個又話殺拒頭。

郎就緬妹妹緬哥，
兩人交情愛奔波，
爛網拿來放紙鷂，
因為風流結頭多。
　
 （27）暗中行
番豆好食泥裡生，
泥裡生根泥裡行，
顯面開花暗結子，
雲掩月光暗中行。

郎系鯽魚妹系鯉，
水底來往冇人知，
水底來往冇腳跡，
冇人敢話涯同爾。

約郎約到月上崗，
楊柳樹下會情郎，
保佑月光雲遮蓋，
免得旁人話短長。

茶樹葉子尖棱棱，
茶樹頭下好交情，
若係路上有人過，
兩人假裝撿茶仁。

同妹上山割櫓箕，
講講笑笑冇人知，
倘若路上人看到，
涯會轉口叫阿姨。

送郎送到五里坡，
五里坡前人又多，
別人問涯送瞞人（誰），
涯話表妹送表哥。

妹子約郎同赴圩，
唔怕旁人講是非，
今下就作兩親戚，
日後就係兩夫妻。

南山雞子北山啼，
路上遇到莫問涯，
有情做出冇情樣，
鬼谷先師也難疑。

阿哥講話愛細聲，
驚怕隔壁有人聽，
城隍廟裡開歇店，
雖然冇鬼得人驚。

囑妹交情莫出聲，
別人知道事難成，
落雨出門愛遮掩，
紙角包鹽愛包咸。

囑妹交情咀莫多，
行路情願打暗摸，
結了交情爾去講，
雪水淋花死過多。

麻竹架橋肚裡空，
兩人相好莫露風，
燕子銜泥咀愛穩，
蜘蛛牽絲在肚中。

園中菜葉些些開，
囑郎摘菜心留在，
有心唔怕人阻隔，
竹筒探水暗中來。

囑妹交情莫出聲，
恰似時鐘肚裡行，
礬水拿來寫信紙，
哪人知得涯名聲。

阿哥莫怨妹冇心，
上鄰下舍眼針針，
燈草拿來做門板，
一出一入愛關心。

燈草拿來做箭枝，
一心射妹怕人知，
老鼠來食貓公飯，
幾多驚險自家知。
　
 （29）幽會
 喜鵲飛上鳳凰台，
妹子打扮出門來，
月光底下來相會，
燈草結子心花開。

妹子約郎柳樹下，
月出嬲到日西斜，
夜靜三更露水大，
有情爾愛脫衫遮。

月出嬲到月斜西，
三更半夜唔分離，
阿哥牽緊妹衫角，
妹子扯緊郎衫尾。
 
城頭更鼓打五更，
聽到更鼓心就驚，
閏年閏月都有閏，
樣般冇人閏五更！

七星緊高月緊低，
露水茫茫雞亂啼，
雙手開門送郎出，
囑郎細看路高低。
　
（30）失約
約郎一番又一番，
唔知約到哪時間？
牛郎織女有相會，
樣般會妹柬艱難！

約了妹來妹唔來，
害涯飯菜漚到黴，
飯菜漚壞還過得，
急壞阿哥愛妹賠。

次次約涯冇次真，
石灰撒路打白紾,
打米問仙同鬼講，
靈前燒香塞死人。

急水灘頭打蝦公，
十次打來九次空，
番番約郎冇見面，
哪有柬多閒人工？

五月五日系端陽，
人山人海看龍船，
一河兩岸望光轉，
樣般唔見伢親郎！

榕樹柬打冇正根，
妹子柬打冇真情，
約到郎來冇見面，
水打棺材溜死人。

落雨又話落雨天，
天晴又話日頭狠，
就像點火燒黃蜂，
各散西東唔得前。